الجميل في هالوصفة إنها متعددة الاستخدامات، ممكن تستخدم كحشوة للفطاير أو البيف باستري أو مع خبز التورتيلا أو الكساديا، ممكن نزود الكريمة و نضيف لها جبن موزاريلا و تخلط مع باستا، ممكن نستخدمها مع المعكرونة بالبشاميل.. الفكرة إنه المجال مفتوح للكثير من الإبداعات، أنا هني استخدمتها كوجبة غداء منخفضة الكربوهيدرات
* المقادير:
- قطعتين صدر دجاج
- نص علبة فطر مقطع شرائح
- بصلة مقطعة شرائح
- فلفل ملون مقطع شرائح (نص فلفلة من كل لون)
- ملح و فلفل
- ملعقة صغيرة أوريغانو
- ملعقتين كبار كريمة خفق سائلة
- زيت دوار الشمس للقلي
* الطريقة:
- نقطع صدور الدجاج مكعبات
- في المقلاة نسخن ملعقة صغيرة من زيت دوار الشمس و نقلي فيها مكبات الدجاج لحد ما تكتسب اللون الأبيض من بره و تصير ذهبي فاتح
- نحط الدجاج المقلي في صحن و نستخدم نفس المقلاة لتحمير البصل بعد إضافة ملعقة ثانية من الزيت
- لما يصير البصل ذهبي نضيف شرائح الفلفل و بعدها شرائح الفطر
- نقلبه شوي بعدين نضيف مكعبات الدجاج و نتبله بملح و فلفل
- نغطيه و نتركه عشر دقايق لحد ما يستوي الدجاج بعدين نضيف الأوريغانو
- نضيف الكريمة و نغطيه لعشر دقايق إضافية
- إذا حابين ممكن نضيف شوي كزبرة مقطعة بس هالخطوة مو ضرورية، و هذا شكله بعد ما صار جاهز
و هني و عافية..